ಹುಟ್ಟಿದ ದಿನಾಂಕ

ನನ್ನ ಜನ್ಮದಿನಾಂಕ ಮರೆಯೆ

ಪ್ರತಿ ಅರ್ಜಿಯಲ್ಲೂ ತಪ್ಪದ ಕಲಮು

ಅಭ್ಯಾಸಬಲ, ನೆನಪಿನ ಬಾಲದ ಬುಡ

ಆದರೂ ಬರೆವಾಗ ದಿಗಿಲು, ಏಕೆಂದರೆ

ನಾನೂ ಗಾಂಧಿಭಾವಬೀಜದ ಬಿಂದು

ಸತ್ಯವಾಕ್ಯಕೆ ತಪ್ಪಿನಡೆದರೆ ಮೆಚ್ಚನಾ ಪರಮಾತ್ಮನು

ಅರ್ಜಿಯ ಕೊನೆಯಲ್ಲಿ ಬರೆದದ್ದೆಲ್ಲ

ಸತ್ಯ ಎಂಬ ಹರಿಶ್ಚಂದ್ರನ ಷರಾ

ಕೈ ನಡುಗುತ್ತದೆ, ಮೈ ಬೆವರುತ್ತದೆ

ನಾ ಹುಟ್ಟಿದ್ದು ಯಾವಾಗ?

ಅಮ್ಮ ಅಪ್ಪನನ್ನು ಅಪ್ಪಿಕೊಂಡಾಗಲೇ?

ಅಮ್ಮನ ಮುಟ್ಟು ನಿಂತಾಗಲೇ?

ಅಥವಾ ಅಪ್ಪನ ಅರ್ಧಹನಿಯಾಗಿ ಚಿಮ್ಮಿದಾಗಲೇ?

ಅಥವಾ ಅವನ ರಕ್ತ ರೇತಸ್ಸಾದಗಲೇ?

ನಾನು ಒಳಹೋದ ಘಳಿಗೆಯೋ

ಹೊರಬಂದ ಘಳಿಗೆಯೋ- ಯಾವುದು

ನಾನು ಹುಟ್ಟಿದ ದಿನ ಘಳಿಗೆ?

ಅಮ್ಮ ಎದೆಹಾಲು ನಿಲ್ಲಿಸಿದ ದಿನ

ಅಪ್ಪ-ಅಮ್ಮ ನಡುವಿನಿಂದ ದಬ್ಬಿ

ನಡುಮನೆಯಲ್ಲಿ ನಿದ್ದೆಗೆ ಪಕ್ಕಾದ ದಿನ

ಸಂತಾನೋತ್ಪತ್ತಿ ಪಾಠ ಕೇಳಿದ ದಿನ

ಸಹಪಾಠಿಯೊಬ್ಬಳ ಕದ್ದು ಮುಟ್ಟಿದ ದಿನ

ನನ್ನ ಮದುವೆಯಂದು ಪ್ರಸ್ತದ ರಾತ್ರಿ

ಹುಟ್ಟಿದೆನೆ ನಾನು?

ನಡುಗುತ್ತಾ ದಾಖಲಿಸುತ್ತೇನೆ

ಜನ್ಮದಿನಾಂಕ : xx - yy - xy